CEBU, Philippines - Gisugdan na sa Department of Environment and Natural Resources ang paghimo sa mas detalyado nga geo-hazard mapping sa mga lugar nga naapektohan sa mga kalamidad sa niaging tuig.
Matud ni DENR-7 Regional Executive Director, Dr. Isabelo Montejo, nga kaniadto ang scale sa ilang geo-hazard mapping anaa sa 1:50,000 apan ilang gihimo 1:10,000 nga maoy ilang gihingusgan karon nga mahuman.
Gihulagway ni Montejo nga importante kaayo ang geo-hazard mapping tungod kay makita sa mapa kung asang dapita ang delikado sa baha, landslide ug uban pang mga delikado nga lugar nga angay likayan.
Ang chief geologist sa Mines and Geosciences Bureau-7, Al Emil Berador, mibutyag nga gihimo ang geo-hazard mapping sa mga lugar sa amihanang bahin sa Sugbo sama sa dakbayan sa Bogo, lungsod sa Borbon, Daanbantayan, Madridejos, Tabogon, Tabuelan ug Tuburan. Aduna usab sila’y gisusi nga relocation site ug mga tunghaan sa amihanang bahin nga naapektohan sa bagyong Yolanda.
Nanghinaut si Montejo sa katawhan nga motuman sa girekomendar sa ilang buhatan ilabi na niadtong mga dapit nga delikado gyud nga puy-an aron malikay sila sa disgrasya. (BANAT NEWS)