CEBU, Philippines - Mga mangingisda ug lumolupyo sa Barangay Bangbang, lungsod sa Cordova mipadala og suwat-hangyo ngadto ni Presidente Aquino nga tabangan sila aron mahunong na ang pag-quary sa mga bato sa baybayon sa ilang dapit.
Si Rogaciano Sumagang, pangulo sa Nagkahiusa’ng Mananagat sa Bangbang (NAMASBA) Inc. miawhag ni Presidente Aquino nga ipaimbestigar si Kapitan Samuel Sumagang ug pasilotan kay miabuso kini pinaagi sa paghatag og permit sa nagpahigayon sa quarry nga walay public hearing nga gipahigayon.
Mga lumolupyo sa Barangay Bangbang mipirma og petisyon nga ang kopya gipadala usab nila sa Department of Environment and Natural Resources (DENR) aron unta katabangan sila nga mapahunong ang quarry operation.
Matud sa pangulo sa NAMASBA nga dako kaayo ang kadaot sa ilang tinubdan sa tubig sa barangay kun magpadayon ang quarry operation kay ang Solid Stones Center Corporation mogamit og kemikals, jack hammers ug uban pa nga kahimanan sa ilang pagpanguha sa mga bato.
Ang buot panguhaon sa nagpahigayon sa quarry mao ang mga Mactan stones. Matud sa pangulo sa NAMASBA nga napugos sila pagdangop sa media aron nga katabangan sila nga molihok na ang hingtungdan nga ahensya sa kagamhanan. (BANAT NEWS)