CEBU, Philippines - Pito ka tawo ang namatay, unom kanila mga bata nga nag-edad pa og 12, 9, 6, 5, 3, ug tulo ka buwang masuso ang namatay human nasunog ang ilang tent nga temporaryong gipuy-an sa biktima sa bagyong Yolanda diha sa Barangay 88 sa San Jose District nga mas naila sa bansag nga “Costa Brava†sa Tacloban City kagahapon sa kaadlawon.
Sumala pa sa report sa The Freeman, namatay usab ang inahan sa mga bata nga si Maria Eleza Ocenar, 38, kinsa gidala sa Eastern Visayas Regional Medical Center.
Ang iyang unom ka tuig nga anak gidala usab sa maong tambalanan apan giingong nakabsan usab sa kinabuhi kagahapon.
Matud pa ni FO1 Anthony Duran sa Bureau of Fire Protection sa maong siyudad naabot sila sa fire scene paglabay sa siyam ka minutos gikan nila nadawat ang alarma, apan nahugmak ug natabunan ang mga biktima sa nagdilaab nga tent.
Ang padre de pamilya sa mga biktima nagtrabaho sa usa ka panagatan sa Samar atol sa pagkahitabo. (BANAT NEWS)