CEBU, Philippines - Usa ka 39-anyos nga lalaking giingong dunay deperensiya sa pangisip ang gipusil patay sa wala mailhing kriminal kagahapon sa kadlawon daplin sa karsada sa N. Bacalso, Lawaan I, dakbayan sa Talisay.
Ang biktimang si Angelito Repuela, taga sitio Camiming, Lawaan III nakaangkon og samad pinusilan sa agtang.
Sa imbestigasyon sa kapolisan nasayran nga sa wala pa mahitabo ang pagpamusil, si Repuela naglingkod daplin sa karsada dihang kalit lang gipusil sa usa ka lalaki.
Matud ni PO2 Edwin Campomanes tiggamitan kaniadto og ginadiling drugas ang biktima hinungdan mibiya ang asawa ug miresulta sa dili maayong pangisip. Ang mga paryente mibutyag sa kapolisan nga sulod-gawas ang biktima sa psychiatric ward sa Vicente Sotto Memorial Medical Center.
Matud ni Campomanes nga manghagis ang biktima kung motukar ang sakit ug posibleng may nasuko hinungdan nga kini gipusil. (BANAT NEWS)