CEBU, Philippines - Natusak sa bala sa kalibre .45 ang ulo sa usa ka tawo nga gipusil sa duha ka wala hiilhing mga lalaki nga nagsakay og motorsiklo sa dalan Rendon, Barangay Poblacion, dakbayan sa Lapu-Lapu alas 5 pasado ang takna sa hapon niadtong Martes.
Ang namatay nga wala hiilhing lalaki gihulagway nga kasarangan ang pamarog ug panglawas nagpanuigon og 40 ngadto sa 45 anyos ug nagsul-ob og short pants ug blue nga t-shirt.
Si PO3 Winston Ybañez sa Homicide Section sa kapolisan sa Lapu-Lapu City Police Office (LCPO) nagkanayon nga naglakaw ang biktima gikan sa merkado paingon sa National Shrine sa Birhen sa Regla sa Barangay Poblacion. Dihang kalit kining gisakdapan og pula nga motorsiklo nga may duha ka wala hiilhing lalaking sakay ug ang nag-angkas mipusil sa biktima sa makadaghang higayon.
Matud pa ni Ybañez nga natusak gyud ang ulo sa biktima nga maoy gipuntariya sa pagpusil nga nakaingon sa hinanali niining kamatayon. Ang mga mamumuno daling miikyas palayo. Way nakuhang ID sa biktima ug nagtuo sila nga dili kini lumolupyo sa maong dapit kay walay nakaila niini. Pito ka basiyo sa kalibre .45 nga bala ug usa ka deformed slug ang nakuha gikan sa crime scene. (BANAT NEWS)