CEBU, Philippines - Wala na mipadayon si Dr. Shawn Espina sa resolusyon nga gipasa ni Konsehal Leah Japson sa pagtugot ni Mayor Michael Rama og pirma sa kontrata ngadto kaniya isip usa ka consultant sa pagdumala sa Cebu City Medical Center (CCMC) nga adunay binulan nga sweldo sa kantidad nga 18 mil ka pesos.
Sa pasiunang sesyon, gipadaplin una ang maong resolusyon ug nadesisyunan nga balikon lang kini ini’g sunod nga adlaw sa sesyon, tungod kay gikwestyon kini sa konseho kay basin unya magkasumpaki ang oras ni Espina sanglit mipasalig man sab siya sa mayor nga motabang hangtud mahuman ang bag-o nga CCMC. Wala na mitunga si Espina sa sunod nga sesyon ug sa interbyu mitataw siya nga di na siya modayon isip usa ka consultant kay aron wa nay samok ug di na malangan pa ang iyang oras sanglit ipadayon gihapon niya ang iyang pasalig nga motabang sa mayor hangtud mahuman ang ospital.
Hinuon wala magmahay si Espina sa iyang desisyon nga mo-back out sa maong tanyag unta kaniya. (BANAT NEWS)