CEBU, Philippines - Maayong pagkapansak sa ilawom sa Ceres bus ang usa ka 4-anyos nga bata nga nataligam-an sa nagbantay niya nga amahan diha sa Palanas, Ronda niadtong Domingo.
Ang biktima naila nga si Rosemarie Tampipi, residente sa maong dapit kinsa giingong kuyog sa iyang amahan nga si Rogelio Tampipi niadtong higayona dihang nahitabo ang aksidente.
Matud pa ni PO2 Lendy Villagonzalo sa Ronda Police Station nga nahinabi sa Banat News nga wala mabantayi sa amahan nga kalit diay mitabok ang iyang anak sa pikas nga bahin sa kalsada.
Naatol usab paglabang sa bata ang pag-agi sa naghaguros nga bus nga gimaneho ni Buevi Lutrago, taga Bacolod, Negros Occidental kinsa wala na gyud niya madala pa og brake.
Ang bata nakaangkon og grabeng kadaot sa iyang kalawasan, nga maoy hinungdan sa iyang hinanaling kamatayon.
Dali hinoon nga mitahan sa iyang kaugalingon ang driver sa maong bus, apan gipagawas ra sab kini human sila nagkasabot nga motabang na lang kini ngadto sa pamilya sa bata nga namatay. (/EIM)(BANAT NEWS)