CEBU, Philippines - Nasikop sa kapolisan ang ikaduha nga suspetsado sa pagpanglungkab og panimalay sa PC Hills, Lahug ug nakuhaan kini og mga mahalon’ng relo nga kabahin sa ilang nakawat. Ang nadakpan mao ang usa ka Lito Mancao, nga matud pa mitanyag sa mga kinawat nga relo sa balay ni Kate Ansani.
Base sa imbestigasyon sa kapolisan nga si Mancao misulay og baligya sa mga relo ug camera ngadto sa usa ka lalaki sa dalan A. Lopez sa Barangay Labangon.
Adunay nakatug-an nga gitanyagan siya nga baligyaan og alahas sa tawo nga nagsul-ob og kaki nga cargo pants ug green nga t-shirt ang suspetsado.
Human makadawat sa kasayuran, ang kapolisan naniid ug ilang nakit-an ang usa ka lalaki nga ang gisul-ob tukma sa gihulagway sa informer. Ang usa ka ahente sa City Intelligence Branch (CIB) nangutana sa baligya niini nga relo ug nagpatuo nga mopalit sa relo ug sa camera.
Matud pa nga ang lalaki mipakita sa relo ug ang camera nga dala niya sulod sa usa ka bag.
Dihang nasuta sa mga CIB agents nga ang relo ug camera susama sa gipangkawat sa usa ka balay sa PC Hills nga iya sa pamilya’ng Ansani dali nga gisikop ang suspetsado. (BANAT NEWS)