CEBU, Philippines - Dakong kantidad nga alahas, salapi ug mahalon nga mga butang ang nahanaw sa usa ka babaye human gilungkab iyang panimalay sa Palm Hills Subdivision, Barangay Tabok, Dakbayan sa Mandaue .
Matud pa gilugit sa mga kawatan ang pultahan sa balay niini ug Martes na sa gabii nadiskubrehan sa biktimang si Dora Dilaoy, 37, matud pang SPO1 Edmundo Belocora. Nasakiyo sa mga kawatan ang P10,000 nga salaping cash, mga alahas nga nagkantidad og P150,000, mga imported nga sabon nga nagkantidad og P4,000 ug imported nga mga perfume nga nagkantidad og P10,000 ug tablet computer nga P15,000 ang kantidad.
Namakasyon ang tibuok pamilyang Dilaoy ngadto sa ilang lungsod sa amihanang bahin sa lalawigan sa Sugbo ug Martes na sa gabii nahibalik.
Gipangita karon sa kapolisan ang panday nga mi-repair sa maong balay aron imbestigahon kabahin sa maong hitabo. (BANAT NEWS)