CEBU, Philippines - Ang Police Regional Office-7 mipataas na sa alert status gikan sa heightened alert ngadto sa full alert sugod kagahapong adlawa duha ka adlaw sa dili pa ang Holy Thursday.
Gimando nga siyento porsyento ang attendance sa kapulisan sa rehiyon matud pang Sr. Supt. Conrad Capa, Deputy Regional Director for Operation.
Matud pang Capa mihatag na sila og direktiba sa tanang provincial ug city directors sa pagtan-aw ug paghatag og igong seguridad sa mga lugar nga sagad adtuan sa publiko.
“Every province there should be an area supervisor especially it’s a long weekend,†matud ni Capa kinsa mipahimangno usab sa publiko nga magmatngon batok sa mga akyat-bahay.
Si Cebu Provincial Police Office Director, Sr. Supt. Noel Gillamac, mipahibalo na usab sa mga ground commanders sa pagpatrolya sa kadalanan ug apil sa ilang bantayan mao ang pagpatuman sa lagda sa trapiko ingon man ang paghubog-hubog sa mga tawo.
Gibana-bana nga mo-deploy og 55 ka pulis ang CPPO ngadto sa Bantayan Island ug laing 40 usab sa lungsod sa Minglanilla alang sa Sugat sa Kabanhawan sa Domingo.
“All personnel will be coming from the provincial headquarters and I think we no longer need an augmentation from the AFP (Armed Forces of the Philippines),†sigon ni Gillamac.
Si Sr. Supt. Anthony Bagarinao, Deputy Provincial Director for Operations, mao ang overall area supervisor sa amihanang Sugbo samtang si Sr. Supt. Renato Malazarte, Deputy Provincial Director for Administration, mao usab ang overall area supervisor sa habagatang Sugbo. Ang send-off ceremony sa mga pulis ipahigayon ugma sa buntag sa CPPO grounds. (BANAT NEWS)