CEBU, Philippines - Gitataw sa kadagkoan sa Commission on Elections nga ang ilang mga kawani ug mga ekipo andam na pagpadayon sa pagpang-rehistro sa mga botante sugod karong Mayo 6.
Kini maoy agi og pagpangandam sa nag-singabot nga Presidential Elections unya sa tuig 2016. Mahimo usab kini nga kapahimuslan niadto’ng gusto nga mobalhin sa pagpuyo sa lain nga mga dapit.
Ang buhatan ni Provincial Elections Supervisor Lionel Marco Castillano mipahibawo nga naabut na ang dugang gikina-hanglanon nga mga Capturing Machines alang sa computerized nga pagparehistro sa mga botante.
Matud ni Castillano nga duna sila’y mga kawani nga mo-operate sa mga computer machines alang sa mas paspas ug tukma nga pagkuha sa biometric data sa mga botante’ng magparehistro.
Giawhag sa kadagkoan sa COMELEC ang mga botante nga mosayo sa pagparehistro aron dili na kini maapeki pag-abot na sa katapusang adlaw sa pagpangdawat sa mga magparehistro nga mga botante.
Subling gipahimangno ni Castillano nga dili g’yud malakip sa mga voters list sa 2016 presidential elections ang mga botante nga dili makuhaan og biometric data sa COMELEC. (BANAT NEWS)