CEBU, Philippines - Patay ang usa ka tawo human kini gidunggab didto sa sitio Lansang, barangay Mactan , dakbayan sa Lapu-Lapu sa milabay’ng gabii.
Ang biktima mao si Golliat Tradio Augusto, 27, residente sa maong dapit. Samtang ang suspek giila nga si Stephen Cantotay Ababa, 23.
Sa pasiunang imbestigasyon ni PO3 Lydo Pinos sa Homicide Section nasayran gikan ni Jean Grace Atillo (kapuyo ni Augusto) nga mga alas 10:30 sa milabay’ng gabii samtang luwan sila ni Augusto sa traysikad nga gimaneho ni Ababa padung pauli.
Matud pa nga pag-abot nila sa ngitngit nga bahin sa dalan gipakanaog sa suspek si Atillo ug gipauna og papauli. Apan pag-abot niini sa ilaha dunay usa ka tawo ang miabot ug gipahibalo siya nga gidunggab ni Ababa iyang kapuyo. Sa pagsusi nila sa lugar, si Augusto nakahiagom og samad dinunggaban sa iyang dughan nga maoy nahimong hinungdan sa iyang hinanaling kamatayon.
Gisusi sa kapolisan ang report nga dunay kalambigitan sa illegal nga drugas ang motibo sa pagpatay kang Augusto tungod kay pipila ka mga residente sa maong dapit ang mipadayag nga ang biktima bilinanan og ilegal nga drugas. Atol sa pagsusi sa crime scene nakuha sa kapolisan ang usa ka itom nga bag nga gamay nga dunay sud nga mga drug paraphernalia.
Apan si Atillo mipasangil nga ang maong ebidensiya gikan ni Ababa. Kasong murder ang ipasakang kaso batok ni Ababa nga anaa karon sa Lapu-Lapu City Police Office detention cell. (/EIM)(BANAT NEWS)