CEBU, Philippines - Kritikal ang usa ka tawo nga biktima sa pagpamusil sa kaugalingon niining uyoan didto sa Barangay Guinsay, Dakbayan sa Danao alas 9:45 ang takna kagahapon sa buntag.
Si PO1 Joseph Alidon miila sa biktima sa pagpamusil nga si Filmar Lao, 33, minyo samtang ang nagpusil kaniya mao si Pablo Gica, 51, nga nadakpan dayon sa mga polis.
Matud ni PO1 Alidon nga nagkalalis pa ang biktima ug suspetsado sa wala pa mahitabo ang pagpamusil.
Dihang nagkainit ang ilang panaglalis ang biktima kalit lang gipusil sa iyang uyoan. Ang biktima gikataho nga nagdala usab og sundang niadtong higayona.
Si Lao gidali pagdala sa Danao District Hospital apan gibalhin sa dakbayan sa Sugbo kay kritikal ang kahimtang tungod sa samad pinusilan sa iyang liog ug duha ka pinusilan sa tuo nga bukton. (BANAT NEWS)