CEBU, Philippines - Ang kadagkuan sa National Food Authority (NFA)-7 nitug-an nga naproblema karon sila sa bodega nga kabutangan sa liboan ka sako’ng bugas nga gitagana alang sa Leyte ug sa Samar nga naapil sa gikuso-kuso sa bagyong Yolanda sa nakalabay nga tuig.
Kini tungod kay wala pa maayo ang mga bodega sa NFA sa Leyte, Samar ug ubang lugar sa Rehiyon-8 nga nagusbat sa bagyo.
Ang tigpamaba sa NFA-7 nga si Ma. Lucia Rosales nitug-an nga nanginahanglan karon sila og dugang bodega nga kabutangan sa kapin sa milyon ka sako’ng bugas nga gi-import sa kagamhanan gikan sa Vietnam para lang sa Visayas.
Matud ni Rosales nga ang NFA padayon nga nakig-alayon ngadto sa mga tig-supply og mga bugas sa kamerkadohan aron may magamit silang mga bodega.
Gipasalig ni Rosales nga ang Kabisay-an aduna’y igong supply sa bugas niining mosunod nga mga bulan kay panahon na man usab sa ting-ani.
Gawas sa mga lokal nga commercial rice ang ilang buhatan mopadayon usab sa pagbaligya sa mga NFA rice ngadto sa kamerkadohan aron may kapilian ang mga kabus nga makapalit lang og ta’g P27 nga bugas mata’g kilo. (BANAT NEWS)