CEBU, Philippines - Kadtong tawo nga mitigbas sa usa ka madre didto sa lungsod sa Consolacion kaniadtong Sabado giandaman na og kaso sa kapolisan nga ipasaka nila sa hukmanan karong adlawa.
Matud ni PO1 Albert Jimenez, sakop sa Consolacion Police Station, nga kaso nga frustrated murder maoy giandam nila nga ipasaka batok ni Romilo Tampus.
Ang 26-anyos nga si Tampus, taga Sitio Tominhao, Barangay Tulo-Tulo, Consolacion maoy mitigbas ug miangol ni Sister Annabel Macas, 36, nga sakop sa Franciscan Sisters.
Ang biktima gisulod ni Tampus didto sa Ave Maria Monastery sa Barangay Sacsac, Consolacion alas 8 pasado sa buntag kaniadtong Sabado ug gitigbas.
Nakasulod si Tampus sa monasteryo pinaagi sa pagkatkat sa koral mao nga gituohan nga ang kapolisan mopasaka pa usab og laing kaso batok sa dinakpan.
Adunay taho nga si Tampus wala sa maayo’ng panghuna-huna ug gani gisirad-an kini sa iyang amahan sulod sa ilang balay sulod na sa pipila ka adlaw nga nakalabay apan nakagawas.
Ang mga madre pa gani maoy mitanyag nga si Tampus ipasulod sa rehabilitation center ug gitakda unta nga kagahapon kini dad-on sa sentro apan nakahimo na hinoon og krimen. (BANAT NEWS)