CEBU, Philippines - Patay nang napalgan sud sa iyang lawak ang usa ka Koreyana sa usa ka beach resort sa Maribago, Lapu-Lapu City.
Ang naghikog mao si Jin Hyejung, 25, kasamtangang nagpuyo sa maong dapit ug tag-iya sa usa ka Korean restaurant sa dakbayan sa Lapu-Lapu. Sa pasiunang imbestigasyon ni SPO2 Manolito Abellanosa nasayran nga mga ala 1:10 sa kaadlawon miabot si Hyejung nga subo ang panagway.
Pipila ka gutlo misud kini sa iyang lawak diin pagkabuntag buot unta kining pukawon ni Pinky Neri usa sa katabang kay sugaton ni Hyejung ang iyang kalive-in sa airport apan wala na kini motubag.
Si Hyejung nga dunay hikot sa necktie sa liog ug ang rod sa kurtina naibot dihang napalgan. Gidali kini og dala sa tambalanan apan gideklarar kini nga patay na.
Sa laing bahin, tungod sa utang nga P3mil usa ka 52-anyos nga ginang ang naghikog sa miaging Miyerkules sa hapon diha sa barangay Bongyoyan, Borbon.
Ang ginang kansang pangalan gitago sa Banat News aron di mauwawan ang iyang pamilya, nagtrabaho isip katabang sa usa ka pamilya. Matud pa ni SPO4 Morie Magdadaro nga nahinabi sa Banat News nakaplagan sa 7-anyos nga anak sa iyang amo ang maong ginang nga nagbitay sulod sa kasilyas.
Patay na kini pag-abot sa Juan Dosado Memorial Hospital , ang bana mitug-an sa kapolisan nga naguol iyang asawa unsaon pagbayad ilang P3 mil nga utang. (BANAT NEWS)