CEBU, Philippines - Ang kagamhanan sa dakbayan sa Talisay nangayo og hinabang pinansiyal sa Kapitolyo aron ilang magamit sa pagsaulog sa “Takas sa Talisay, Kagawasan sa Sugbo†nga naila kaniadto nga Talisay American Landing.
Si Konsehal Doroteo Emit, tsirman sa committee on heritage, tourism and arts sa Talisay City Council, miingon nga ang siyudad kuwang og kwarta nga magamit pag-abaga sa galastohan sa maong kasaulogan. Karong Marso 26 mao na ang pagsaulog sa Takas sa Talisay diin ang “re-enactment†sa padunggo sa mga Amerikanong sundalo anha ipahigayon sa kabaybayonan sa barangay Poblacion.
Kaniadtong Martes, giaprobahan sa Talisay City Council ang mga resolusyon nga gisugyot ni Emit nga nangayo og P500 mil nga hinabang gikan ni Gobernador Hilario Davide III ug laing ‘tag P250 mil kanila ni Bokal Julian Daan ug Raul Alcoseba.
Matud ni Konsehal Emit nga kinahanglang paninduton g’yud ang selebrasyon aron makadani kini og daghang mga tawo nga mosaksi sa makasaysayanon nga pagdunggo sa mga sundalo nga Amerkano.
Si Emit miingon nga ang Takas sa Talisay angayang saulugon g’yud sa tibuok probinsya.
Mata’g tuig mutambong sa re-enactment sa Takas sa Talisay ang mga langyaw ug local nga dignitaries lakip na ang mga turista ug angayan lang nga pauswagon ang kasaulogan. - /RUB (BANAT NEWS)