CEBU, Philippines - Duha ka pison nga gigamit sa pag-aspalto sa General Maxilom Extension ang gisakmit sa mga sakop sa City Traffic Operations Management (CITOM) kagahapon kay bisan buntag na nagsige lang gihapon sa ilang pagtrabaho.
Ang gihimo sa mga trabahador sa Worldwide Construction nakalapas sa kamandoan ni Mayor Michael Rama nga ang pag-aspalto sa mga karsada himoon lang gikan sa alas nueve sa gabii ngadto sa alas singko sa buntag.
Matud ni CITOM operations officer Joy Tumulak nga ang duha ka pison nga giabangan sa Worldwide Construction gikan sa Socor Construction nagtrabaho lang gihapon bisan og alas 5:35 na sa buntag kagahapon.
Si Mayor Rama mitug-an sa Banat News nga ang pagsakmit nila sa duha ka heavy equipment sa construction company maoy pagpaila nga dili komedya ang iyang kamandoan.
Ang mayor mimando nga sa gabii lang ipatrabaho ang pagpang-aspalto ug pag-ayo sa mga karsada dinhi sa dakbayan aron nga dili mabalda ang mga moagi nga sakyanan.
Si City Engineer Jose Marie Poblete miingon nga gipahibalo na niya si DPWH District Engineer Nicomedes Leonor kabahin sa kamandoan ni Mayor Rama.
Wala pa masayud si Tumulak kun pamultahon ba ang kontraktor nga nagtugot nga motrabaho gihapon ang ilang mga trabahador bisan og buntag na. (BANAT NEWS)