CEBU, Philippines - Upat ka tawo ang nasikop lakip na ang usa ka gipasanginlang big-time drug pusher atol sa managlahing drug operation sa lalawigan sa Sugbo kagahapong adlawa.
Nasikop sa mga sakop sa Philippine Drug Enforcement Agency 7 ang managsuon ug ang look-out nila human gi-serve ang usa ka search warrant sa panimalay sa mga suspek kagahapon sa kaadlawon didto sa Poblacion I, dakbayan sa Carcar.
Ang nasikop mao sila si Jay Camotes ug Joan Camotes, ug ang giingong ilang lookout nga si Samuel Barcelona pinasikad sa search warrant nga giluwatan ni Judge Soliver Peras sa RTC Branch 10. Si PDEA 7 Regional Director Lyndon Aspacio miingon nga ang duha pulos bigtime drug pushers ug taud-taod na nila nga gipanid-an. Nakuha gikan sa duha ang binulto nga shabu, usa ka 12-gauge nga shotgun, KG9 ug usa ka paltik nga de bomba ug kalibre .45 nga pistola.
Miingon si Aspacio nga misulay og kuot sa iyang kalibre .45 nga pistola si Barcelona atol sa pag-serve sa maong warrant apan nadisarmahan kini sa mga ahente.
Sumala ni Aspacio nga gikan sa gawas sa Carcar City ang supplier sa managsuon ug ang ilang operasyon nga miabot na sa mga sikbit nga lungsod.
Samtang usa ka level two drug pusher ang nasikop sa mga sakop sa Regional Anti Illegal Drugs Special Operations Task Force sa buybust operation nga ilang gipahigayon didto sa Cordova kagahapon sa buntag.
Ang nasikop naila nga si Gino Pilapil nga naaktohang mibaligya og usa ka pakete nga shabu balor P200.
Narekober gikan sa suspek ang 16 ka paketeng shabu ug usa ka dakong putos nga may sud gihapong gidudahang shabu.
Gibana-bana nga mokabat P50 mil ang kantidad sa mga shabu nga narekober gikan kaniya.
Apan ang dinakpan hugot nga mihimakak sa pasangil kaniya. (BANAT NEWS)