CEBU, Philippines - Usa ka konduktor sa jeep pasaheroan gidunggab patay sa gikabikil nga laing konduktor sa barangay Poblacion, dakbayan sa Danao alas-2 pasado ang takna sa miaging kaadlawon.
Ang namatay mao si Ninolito Roble Juntilla, 26, taga barangay Cogon East, lungsod sa Carmen, ug ang suspetsado nga nagdunggab mao si Jeffrey Zanoria, taga dalan S. Duterte, barangay Suba, barangay Poblacion, dakbayan sa Danao.
Si SPO1 Rodrigo Roble Jr., sa kapolisan sa maong dakbayan miingon nga dugay nang gikabikil sa biktima ang suspetsado tungod sa panag-ilog nila sa torno sa pagpangonduktor.
Matud pa ni Roble nga dihang nakita sa suspetsado ang biktima nga mianha sa ilang pwesto kalit kining gidunggab sa ilok ug uban pang bahin sa lawas.
Human sa maong pagdunggab ang suspet-sado dali nga misibat pahilayo sa maong dapit samtang ang biktima nga grabe ang kahimtang dali nga gihatod sa Danao District Hospital apan gideklarar kini sa mga doktor nga dead on arrival.
Karong adlawa gikatakdang pasakaan og kaso ang maong suspetsado. (/EIM)(BANAT NEWS)