CEBU, Philippines - Gikatakda ugmang adlawa magtagbo ang Cebu Provincial Anti-drug Abuse Council (CPADAC), Philippine Drug Enforcement Agency (PDEA), Provincial Health Office (PHO) ug Budget Office aron tukion ang planong random drug testing sa tanang empleyado ug opisyales sa Kapitolyo.
Sa draft resolution ni Meca, pangulo sa komitiba sa CPADAC, gisaysay nga usa kini sa mga lakang sa pagpalambo sa kampanya batok sa ilegal nga drugas sa tibuok probinsya.
Matud niya ang Comprehensive Dangerous Drug Act of 2002 nagmando og random drug testing ngadto sa mga kawani ug opisyales sa gobiyerno matag karon ug unya.
Sumala pa ni Meca nga usa ka maayong ehemplo nga ang mga kawani ug opisyales sa Kapitolyo maoy mangulo sa Kampanya batok sa ilegal nga drugas.
“CPADAC is in the stage on campaigning against illegal drugs. Before going on, it is best to clear first the provincial government of Cebu,†matud ni Meca. Gikatakda unta nga iduso kagahapon ang maong resolusyon atol sa gihimong regular session sa Hunta Probinsyal apan iya kining gibakwi tungod kay kinahanglan pa nga adunay coordination meeting nga pagahimuon ang komitiba uban sa PDEA ug PHO. Hinuon, iya kining iduso sa sunod semana. (/EIM)(BANAT NEWS)