CEBU, Philippines - Ang tanang kapitan sa tibuok probinsya sa Sugbo giawhag ni 6th District Provincial Board Member Thadeo Ouano nga sutaon kun hain sa ilang mga dapit nga sagad mahitabo ang pagdahili sa yuta, lunop ug baha.
Matud ni Ouano nga ang 2,202 ka kapitan sa tibuok probinsya sa Sugbo daku kaayo og ikatabang aron ang kagamhanan makakuha og kasayuran nga masayod sila unsaon pagtabang sa apektado nga katawhan.
Nahukman ni Ouano ang pagduso og resolusyon sa Cebu Provincial Board human ang 219 ka pamilya sa Barangay Gaas, Balamban namakwit tungod sa pagpangliki sa yuta sa ilang dapit.
Ang kadagkoan sa Mines and Geosciences Bureau (MGB) ug ang Philippine Institute of Volcanology and Seismology (Phivolcs) mipahibalo na nga adunay fault lines ang kabukiran sa Sugbo.
Si Ouano, tsirman sa committee on environment sa Cebu Provincial Board, nagduda nga ang nakaingon sa pagliki sa yuta sa Gaas mao ang kanunay nga pag-ulan ug gikabalak-an nga modahili ang yuta sa maong dapit.
Matud ni Ouano nga ang mga barangay kapitan adunay kaakuhan sa paghatag og kasiguroan sa ilang mga molupyo nga malikay sila nga mabiktima sa pagbaha o pagdahili sa yuta. (/RUB)(BANAT NEWS)