CEBU, Philippines - Ang mga opisyal sa dakbayan sa Mandaue nga pangulohan mismo nila ni Mayor Jonas Cortes ug Vice Mayor Glenn Bercede moadto sa Tacloban karong Huwebes aron pagtunol sa ilang mga hinabang sa mga biktima sa bagyo’ng Yolanda.
Si Roger Paller nga maoy public information officer sa Mandaue mibutyag nga ang hinabang maglakip sa kinarton nga mga pagkaon, canned goods, mga sinena ug uban pa nga tabang nga gikan sa Kryola Foundation ug Food Bev International. Matud ni Paller nga human g’yud sa bagyo kaniadtong Nobiyembre 8 ang dakbayan sa Mandaue mihatag dayon og tabang sa mga biktima sa Tacloban pinaagi sa mga media outlets nga naghimo og relief operations.
Si Paller miingon nga ila nang giandam ang 12 ka dagko nga karton nga sudlan sa mga sinena ug uban pa nga tabang para sa mga biktima sa bagyo sa Tacloban.
Ang 15 ka lungsod sa amihanang Sugbo nga naigo ‘sab pag-ayo sa bagyo’ng Yolanda gihatagan na og tabang-salapi sa kagamhanan sa Mandaue.
Apil nga nakadawat sa tabang sa Mandaue mao ang mga lungsod sa isla sa Bantayan ug Camotes. (/RUB)(BANAT NEWS)