DOH wa morekomendar sa pagpalit og tambal sa internet
CEBU, Philippines - Luyo sa nagkadaghang kaso sa tipdas sa nasud, wala morekomendar ang Department of Health (DOH) nga mamalit og tambal ug bakuna niini sa mga online shop tungod kay posibleng peke ang produktong mapalit.
Si Elvira Bongosa sa Phil. Information Agency (PIA)7 mipahayag kagahapon nga girekomendar ni DOH Assistant Secretary Eric Tayag, nga mas maayo pa nga moadto sa mga health center o lisensyadong doktor aron masusi ug di mailad.
Miingon si Bongosa nga gusto ni Tayag sa health center lang moduol ang pasyente kay libre ug walay bayad ang pagpabakuna sa maong mga lugar nga iya sa gobiyerno.
Matud pa ni Bongosa nga tungod sa padayong pagdaghan sa nataptan sa sakit nga tipdas sa nasud, giaghat sa DOH ang mga ginikanan nga pabakunahan ang ilang mga anak aron makalikay niini.
Sumala ni Bongosa nga niadtong Disyembre, nipagawas og pasidaan ang Food and Drug Administration (FDA) sa publiko batok sa pagpalit og mga tambal ug bakuna sa mga online shop.
Siya midugang nga ang maong pasidaan gihimo sa FDA human madiskobrehe niadtong Nobiyembre 2013 nga adunay kapin sa 100 ka prescription sa mga tambal ug mga produkto alang sa panglawas sa tawo ug mananap ang gitangtang sa online buy-and-sell website nga sulit.com.ph tungod kay giingong dili luwas gamiton.
Nagkanayon si Bongosa nga gipaabot pa sa DOH ang listahan gikan sa FDA sa mga advertisement nga kinahanglan pa nilang tangtangon.
Matud pa niya nga gipasalig ni Tayag nga padayon ang DOH sa pagmonitor bahin sa pagbaligya og bakuna ug uban pang mga tambal sa internet. (/WC)(BANAT NEWS)
- Latest
