CEBU, Philippines - Tungod sa dautang panahon, tulo ka barko ang nasangad sa managlahing higayon sa Cebu ug Bohol apan walay gikatahong naangol ug nasamdan, matud sa Coast Guard Central Visayas.
Ang M/V Joyful Stars, usa ka barkong de pasahero gikan sa Mindanao, nasangad sa Bantolinao Point, Lapu-Lapu City mga ala una sa kadlawon Enero 16.
Mibiya kini sa Maasin, Leyte alas-4 sa hapon Enero 15 sakay ang 295 ka pasahero nga kasagaran moanhi sa Sugbo tungod sa Sinulog Festival. "Malakas ang alon saka hangin. The vessel was drifted to Bantolinao Point. They were battered by strong waves at siguro di na nakayanan kaya they ran aground," matud sa hepe sa Coast Guard Central Visayas Commodore William Melad.
Dugang ni Melad, hapit na unta kining maabot sa Sugbo dihang napadpad sa kusog nga hangin ug bawod. Ang Roble Shipping, kinsa tag-iya sa M/V Joyful Stars ingon man ang Coast Guard mipahigayon og rescue operations aron mabalhin ang mga pasahero ngadto sa usa ka yacht club pier sa habig sa lungsod sa Liloan.
Samtang ang M/V Subic Bay 1, laing cargo vessel ang nasangad usab duol sa naglutaw nga M/V Joyful Stars dihang gipadpad usab sa hangin alas 2:44 sa kaadlawon kagahapon.
Matud sa Coast Guard, ang cargo vessel nga gipanag-iya sa Gothong Shipping ug dunay dalang container vans migikan sa Nasipit, Butuan alas 2:30 sa hapon Enero 15 paingon unta sa Sugbo.
Si Melad misiguro nga wala kini namelegro sa pagkalunod, gani siya misulti nga ang crew members sa cargo vessel atoa nagpundo sa barko nga nasangad duol sa Lapu-Lapu City. Ang ikatulong barko nga nasangad mao ang usa ka de pasahero nga naggikan sa Bato, Leyte alas 9 sa gabii Miyerkules paingon unta sa Sugbo.
Ang M/V Our Lady of All Nations, gipanag-iya sa Medallon Transport Inc., nasangad sa Danajon Bank, duol sa amihanang bahin sa Bohol pag-abot sa tungang gabii human kini mibiya.
"May 90 passengers ang M/V Our Lady of All Nations. Meron ding cargo. As of now (kagahapon sa hapon), they are still there sa Danajon Bank. Nahihirapan ang Coast Guard vessel na makalapit dahil sa lakas ng alon. Ang sister ship nito na M/V Prosperity ay on its way na.
Estimated na darating sa Danajon Bank 6pm," si Melad nagkanayon. Luwas ra tanan ang pasahero ug tripulante niini. Si Melad midugang nga wala pa makasang-at sa ilang marine protest ang mga nasangad nga barko kun makadunggo na silang tanan. (BANAT NEWS)