CEBU, Philippines - Naangol ang usa ka Australian national human kini mapusili samtang nagtan-aw sa grupo sa mga batan-on nga nag-away sa 2nd level sa parking area sa Mango Square sa General Maxilom Avenue pasado alas 5:00 sa buntag sa miaging adlaw.
Ang biktima naila nga si John Asho, 28, 4th year sa kurso nga medicine sa Southwestern University ug lumad nga taga-Sydney Australia.
Base sa imbestigasyon sa kapolisan nga ang biktima nagtan-aw lang sa away sa mga batan-on dihang dunay mipaka nga buto sa armas ug naigo ang biktima sa tuong bahin sa tiyan nga milapos sa tuong bukton.
Daling misibat ang maong mga batan-on human mapusilan ang maong langyaw.
Samtang ang maong langyaw bisan samaran nakahimo pa gihapon sa pagdagan ngadto sa Chong Hua Hospital.( /EIM)(BANAT NEWS)