CEBU, Philippines - Ang most wanted criminal sa dakbayan sa Lapu-Lapu nasikop sa Criminal Investigation and Detection Group 7 human sa iyang napulo ka tuig nga pagtago-tago didto sa barangay Gredu sa dakbayan sa Panabo sa Davao Del Norte pasado alas 12:00 sa miaging udto.
Ang nasikop mao si Ritchilieu Amodia, 42, minyo, drayber, lumad sa dakbayan sa Lapu-Lapu.
Matud pa sa kapolisan nga nasikop ang biktima human masuta sa CIDG 7 ug sa CIDG-CARAGA ang iyang pinuy-anan sa Davao.
Sumala pa sa mga otoridad nga duna nay warrant of arrest ang maong suspetsado nga giluwat sa kanhi RTC Presiding Judge Benedicto Cobarde sa Branch 53 nga walay pyansa nga girekomendar.
Ang maong suspetsado gipasakaan sa kasong murder human niya pusila si Edgar Cañares gamit ang wala pa matino nga kalibre sa armas niadtong Agosto 24, 2013 sa balay niini sa BF Homes sa barangay Pajac sa dakbayan sa Lapu-Lapu.
Anaa na karon sa prisohan sa dakbayan sa Lapu-Lapu ang maong wanted. (BANAT NEWS)