CEBU, Philippines - Gidala sa Fuente Police Station ang usa ka empleyado sa canteen sa Kapitolyo human kini giingong nanguha og mga relief packs nga nahimutang gawas sa Provincial Social Welfare and Development Office (PSWDO).
Pinaagi sa Closed-Circuit Television kon CCTV camera, nailhan sa buhatan sa Provincial Chief of Security ang tindera (kansang pangalan gipugngan sa Banat News hangtud di mapasakaan og kaso) nga mikuot sa mga sinako nga mga relief goods nga alang unta sa mga biktima sa bagyong Yolanda.
Ang mga CCTV footage sa kapitolyo mipakita nga katulo ka higayon nga gihimo sa tindera ang pagpangawat.
Nahitabo kini niadtong Nobiyembre 12, 28 ug 29, sa alas 5:40 ngadto sa alas 6 sa buntag.
Matud ni Loy Madrigal sa Security Office nga wala pa mahibaw-i kun pila gyud ang kantidad sa nakuhang relief packs. Apan siya misaysay nga bisan pa man sa mga rason nga gihatag sa tindera, pasakaan gyud nila kini og kaso.
Sigon usab ni Madrigal nga gipatawag na ang tindera niadtong Biyernes. Una daw kining milimod apan miangkon ra usab ug mihangyo nga iuli ang mga nakuha.
“Dili na ta interesado kun iuli pa ang iyang nakuha. Kanang mga tawo nga nagbuhat og ingon ani, nagpahimulos sa higayon, di ta mo-tolerate ana,†dugang pa ni Madrigal.
Mitataw usab si Madrigal nga bisan pa man og adunay mga sibilyan nga nagwardiya sa mga relief goods apan nakalusot gihapon ang tindera.
Gisuwayan sa pagkuha sa Banat News og habig ang maong tindera apan gipugngan kini sa tag-iya sa gitrabahoang kantina.
Si Evelyn Senajon sa PSWDO usab mitataw nga duna pay mga relief goods nga nahimutang pa gawas sa ilang buhatan alang sa food-for-work program sa mga local government units sa amihanang Sugbo.
Si PO2 Gelo Destacamento sa Fuente Police Station mipahibalo usab nga gibuhian ra ang tindera apan mag-atubang kini og kasong pagpangawat.
Makighinabi pa si Madrigal sa Provincial Legal Office alang sa mga lakang nga buhaton sa Kapitolyo batok sa tindera. (BANAT NEWS)