CEBU, Philippines - Malinawon ang tinuig nga pangilin sa Birhen sa Regla nga maoy patron sa dakbayan sa Lapulapu taliwala sa nagsugwak nga mga deboto sa national shrine niini sa barangay Poblacion sa Nobiyembre 20 nga bisperas ug hangtod na iyang kapistahan sa Nobiyembre 21.
Kini dakong sukwahi sa nangaging mga tuig sa iyang pangilin nga sagad adunay mabiktima sa pagpamusil, pagpanunggab, pagpanguot ug pagpanglabni nga matala ang buhatan sa kapolisan nga maoy hinungdan nga higpit kini nga gibantayan ang pagpatuman sa kahapsay ug kalinaw.
Si PO1 Jade Querobin sa Homicide Section sa kapolisan sa maong dakbayan nga nahinabi sa Banat News miingon nga sukad sa sayo sa buntag sa bisperas sa maong pangilin wala sila makatala og biktima sa mga krimen.
Hinuon si Senior Superintendent Rey Lyndon Lawas, director sa Lapulapu City Police Office (LLCPO) daan nang nagdestino og mga polis sa mga dapit diin sagad mahitabo ang mga kagubot.
Naglakip sa gibutangan og mga polis nga mga dapit mao ang National Shrine sa Birhen sa Regla sa barangay Poblacion, barangay Pajo, barangay Looc, barangay Gun-ob ug barangay Pusok sa maong dakbayan.
Giabagan usab ang kapolisan sa pagmentinar sa kahapsay ug kalinaw pinaagi sa pag-abag usab sa serbisyo sa mga barangay tanod nga maoy hinungdan nga naangkon gayod sa dakbayan ang kamalinawon sa iyang tinuig nga pangilin. (BANAT NEWS)