CEBU, Philippines - Misumbong sa kapolisan ang usa ka babaye human siya bunali og pul-an sa pistola sa iyang silingan nga lalaki didto sa Bless Ibabao, lungsod sa Cordova sa miaging buntag.
Si SPO1 Danny Alboro sa kapolisan sa maong lungsod miila sa biktima nga mao si Madelyn Densing, 28 , dalaga, ug ang suspetsado nga mibunal og pistola sa iyang nawong mao si Xinciel Sitoy, hingkod, minyo, ug nagpuyo sa maong dapit.
Matud pa ni SPO1 Alboro nga giasoy sa biktima nga human sa miaging barangay election gidapit siya sa asawa sa maong suspetsado sa pag-adto sa ilang balay sa tuyo nga ilang kaestoryahan ang na-post sa iyang facebook bahin sa giingong pagpanaway sa biktima kaniya.
Dugang pa sa biktima nga misanong siya sa maong pagpanapit kay buot usab unta niyang kalimpiyohan iyang ngalan gikan sa maong mga pasangil nga wala niya mabuhat.
Gipasabot ni Densing nga laing tawo ang nag-post sa facebook sa asawa sa suspek ug gigamit lamang niini ang iyang account.
Samtang nagpadayon sila sa ilang panagsulti kalit lang mitumaw ang suspetsado gikan sa ilang likoran ug dayong hapak sa iyang ulo sa pul-an sa armas busa napawong makadiyot ang iyang panan-aw ug gani nakakita siya og mga aninipot.
Dugang pa sa biktima nga wala matagbaw ang maong suspetsado gitionan pa usab siya sa armas niini ug mipadayag nga patyon siya kun magpadayon kini sa pagbugal-bugal. (BANAT NEWS)