CEBU, Philippines - Gipangimbargo sa kapolisan ang mga garud nga guna ug martilyo didto sa sementeryo sa Katoliko sa sitio Humay-humay barangay Gun-ob dakbayan sa Lapulapu kagahapon.
Ang garud nga guna alang unta sa pangiskis sa mga tinulo nga kandila ug ang martilyo gigamit sa pagpanday ug panukdok sa mga gubaon nga bahin sa lubnganan.
Si SPO3 Joseph Mandal sa kapolisan sa Presinto 3 sa Lapulapu City Police Office (LLCPO) nga nahinabi sa Banat News kagahapon miingon nga gihimo nila kini aron walay moabusar nga mga molupyo.
Matud pa niya nga lakip sa ilang gidili sa sulod sa sam-ang mao ang mga ilimnong makahubog ug mga ilimnon nga gisulod sa botelya nga mabuak .
Dugang pa niya nga ilang inspeksiyonon ang mga bag sa mga tawo nga mosulod sa maong sam-ang sa tuyo nga luwas ang tanan nga mobisita sa lubnganan sa mahal nila sa kinabuhi.
Si Senior Superintendent Rey Lyndon Lawas, hepe sa kapolisan sa Lapulapu City midestino og kapolisan sa mga sam-ang nga naglakip sa Mactan Island Memorial Garden ingon man usab sa sam-ang publiko, tanan sa barangay Marigondon sa maong dakbayan.
Si PO2 Modesto Lutchavez sa kapolisan sa Presinto 1 sa Mandaue City Police Office (MCPO) nga nahinabi sa Banat News miingon nga sa barangay Guizo ilang gibantayan ang tulo ka mga sementeryo nga naglakip sa duha ka pribado ug usa ka sementeryo nga gidumala sa simbahang Katoliko. (BANAT NEWS)