CEBU, Philippines - Nadakpan sa akto sa tag-iya sa balay ang usa ka batan-on nga misulay sa pagpangawat sa ilang mga butang didto sa sitio Datag sa barangay Maribago, dakbayan sa Lapulapu sa miaging gabii.
Ang nadakpan mao ang 16 anyos nga bayong-bayong kinsa lumad nga taga Cadulang, sa dakbayan sa Naga.
May kauban siya nga tulo ka mga lalaki nga nailhan lang sa mga angga nga John Paul, J.R. ug Bandebar nga taga dakbayan sa Mandaue.
Si PO2 Samuel Evalle sa kapolisan sa Presinto 2 sa Lapulapu City Police Office (LLCPO) nga nagbase sa barangay Mactan nga nahinabi sa Banat News miingon nga ang tag-iya nga si Richard Ong ug mga sakop sa iyang pamilya nanglakaw kay mitambong og prayer meeting.
Sa ilang pagpauli ilang namatikdan ang tulo ka tawo nga nag-atang sa ganghaan sa gate sa ilang balay apan sa pagkakita sa ilang sakyanan kalit lang nanagan pahilayo.
Dali nga nakatawag sa buhatan sa kapolisan ang biktima ug sa ilang pagsulod sa ilang balay ilang naabtan ang bayong-bayong nga migawas nga dala ang ilang mahalon nga table computer, cell phone ug salapi .
Si PO2 Evalle miingon nga sa ilang pagsukitsukit mitug-an kini nga iyang gisulod ang balay sa biktima pinaagi sa pagkatkat sa koral niini.
Giila usab sa maong dinakpan ang tulo niya ka mga kauban sa angga lang , apan gitataw niini nga duha ang taga dakbayan sa Mandaue.
Tua siya itunol sa buhatan sa Department of Social Welfare and Development, samtang padayong gipangita sa kapolisan ang iyang mga kauban. (BANAT NEWS)