CEBU, Philippines - Ang kadagkoan sa Land Transportation Franchising and Regulatory Board (LTFRB) miangkon nga wala g’yud sila’y mahimo batok sa mga tag-iya’g sakyanan nga anha lang iparada ug pabuntagan sa daplin sa mga karsada.
Si Ahmed Cuizon, regional director sa LTFRB dinhi sa Central Visayas, nangatarungan nga 17 ra silang tanan diha sa iyang opisina ug wala na’y makaasikaso aron susihon kinsa ang mga tag-iya og public utility vehicles nga wala motuman sa lagda.
Ang LTFRB adunay lagda nga kadtong mo-apply og prangkisa alang sa mga passenger jeepneys, bus, taksi, van for hires ug mga truck, kinahanglan nga aduna sila’y mga grahe nga kabutangan sa ilang sakyanan.
Matud ni Cuizon nga ang mga operators mosukip og sketch sa nahimutangan sa ilang garahe sa sakyanan apan ang nakaproblema mao nga wala sila’y mga sakop nga mosusi kun wala ba mamakak lang ang mga gusto nga mokuha og prangkisa.
Giangkon ni Cuizon nga bisan siya mismo nakabantay nga daghang mga public utility vehicles nga anaa ra gipangparada daplin sa karsada panahon sa gabii ngadto na sa buntag.
Ang Banat Manobela misuroy sa lainlaing barangay dinhi sa dakbayan lapas sa tungang gabii ug nakita ang gatusan ka PUJ, taksi ug mga trak de karga, apil ang mga private vehicles nga anaa ra giparking sa karsada.
Matud ni Cuizon nga malipay sila kun dunay mga tawo nga moreklamo gyud sa ilang opisina kabahin niini ug nga motunga sila sa imbestigasyon kun ipatawag na nila ang tag-iya sa maong mga sakyanan.
Nabantayan sa Banat Manobela nga dunay mga tag-iya og PUJ ug bisan taksi nga may garahe apan dili makasapar sa tanan nila nga sakyanan.
Usa ka tag-iya og mga PUJ kang kansang garahe anaa sa eskina V. Rama ug P. del Rosario Extention nasakpan nga tulo sa iyang mga sakyanan diha sa karsada nagparking.
Mga bombero dugay ra nga nangreklamo kay panahon nga adunay sunog sa mga sudlonon nga bahin sa barangay dili dayon sila makasulod tungod sa mga sakyanan nga nakababag sa karsada.
Gusto ni Cuizon nga unta ang local government units, sama sa dakbayan sa Sugbo, motabang sa LTFRB aron pagtudlo’g leksyon niining maong mga operators.
Apan usa ka opisyal sa City Hall miingon nga dili tukma ang gihimo sa LTFRB nga nagpaturagas lang paghatag og prangkisa bisan wala makasiguro nga ang applicant dunay tukma nga garahe sa iyang mga sakyanan.
Si CITOM Executive Officer Rafael Christopher Yap miingon nga misugyot na siya sa City Hall nga mopalit og duha ka tow truck aron moguroy sa mga sakyanan nga masakpan nga ipataka lang pagparking.
Matud ni CITOM Chairman Ruben Almendras nga gusto g’yud niya nga adunay balaud nga apilon ang mga tag-iya og pribadong sakyanan nga kinahanglang duna sila’y garahe sa dili pa tugutan nga mopalit og sakyanan, unya hugtan sa pagpatuman ang maong lagda. (BANAT NEWS)