CEBU, Philippines - Ang buwan sa Oktubre gitawag nga “pink month†o buwan alang sa pagsaulog sa “breast cancer†matud pa ni Dr.Saheshe Tracy Anne B. Fernandez, ang hepe sa Breast Center Clinic sa Vicente Sotto Memorial Medical Center (VSMMC) sa dakbayan sa Sugbo.
Sa pakighinabi sa Banat News gibutyag ni Dr. Fernandez nga matag tuig daghan ang makabsan og kinabuhi gumikan sa breast cancer. Kining maong sakit kumon kaayo sa mga kababayen-an gikan sa 20-50 ang edad.
Gitawag kini nga breast cancer tungod kay anha kini moturok sa suso sa babaye.
Sa sinugdan gagmay ra kining bugon, apan magtubo kini nga kun di matambalan mobuto nga maoy kamatyan sa masakiton. Busa matud pa ni Dr. Fernandez nga aron masalbar ang usa ka pasyente, inig kamatngon niya nga may gamay siyang bugon sa totoy iya dayon kining ipahiling sa doktor.
Tomaron kun may iresetang tambal kay kun gagmay pa ang bugon, mahilis pa kini sa tambal.
Midugang si Dr. Fernandez nga kun modaku na ang bugon nga mawatag nga anaa sa stage 4, nga talibuto na gyud o kaha nakabuto na, lisud na kining hilison sa mga tambal.
Miingon siya nga gikan sa stage 1 kutob sa stage 3, puwede pang matambalan, apan kun stage 4 na lisud na nga mamaayo ang pasyente sa maong sakit. Gisukit kun unsa gyu’y nag-unang hinungdan nga motapot ang maong matang sakit sa babaye, si Dr. Fernandez igo lang miingon nga walay nasayud sa hinungdan niini. (/WC) (BANAT NEWS)