CEBU, Philippines - Ang kagamhanan sa syudad sa Sugbo naglaraw nga mohatag og pasidungog ngadto sa matinud-anon nga polis sa syudad sa Sugbo nga miuli sa bag nga iyang nakit-an sa taxi ngadto sa tag-iya niini.
Si Mayor Michael Rama nagkanayon nga ang kagamhanan sa syudad mohatag unya og pasidungog ngadto kang SPO2 Isagani Ceniza human kini niuli sa gamay nga bag nga gipanag-iya sa usa ka balikbayan nga si Erlinda Fleming.
Ang maong bag may sulod nga dul-an sa 100 ka libo ka pesos nga balor sa mga US dollars, mga alahas sama sa ariyos ug singsing ug ingon mga identification card.
Si Rama miingon nga nakadayeg kaayo siya kang SPO2 Ceniza tungod sa talagsaon nga kinaiya niini. Mas nisamot ang iyang pagdayeg sa maong polis human nagdumili sa pagdawat sa gitanyag nga ganti ang nahisgutang polis .
Iyang gipahibawo nga iyang ipaapil sa mga nominees ang nahisgutang polis nga pasidunggan atol unya sa ika-77th Charter Day Celebration sa Cebu sa bulan sa Pebrero 24 sa sunod tuig. Ang maong polis posibling makadawat og Mayor Special Award isip pag-ila sa iyang maayong pagtulon-an nga natampo dinhi sa syudad sa Sugbo.
Gawas sa mayor si Cebu City Police Office chief Sr. Supt. Noli Romana nakadayeg usab sa nahisgutang polis. (BANAT NEWS)