CEBU, Philippines - Ang Food and Drug Administration (FDA) mipasidaan sa publiko batok sa pag-inom sa powder juice nga Green Barley nga gipaila isip "total food powder juice" nga giingong makaayo sa nagkalainlaing sakit.
Matud pa ni Kenneth Hartigan-Go, pangulo sa FDA nga ang maong produkto gibaligya lamang sa tag P275 ngadto sa P300 matag botelya sa kamerkadohan ug usab sa internet-online shops.
Dugang pa ni Hartigan-Go nga gisulod kini sa plastik nga botelya sa pinulbos nga hitsura.
Gipasabot ni Hartigan-Go nga ang Green Barley may sayop nga pahibawo sa publiko kay aduna kuno kini 'health and therapeutic' effect base sa ilang mga pahinumdom o advertisement nga giimprinta o ba kaha ngadto sa digital media.
Subay niini, gimandoan sa FDA ang ilang mga field officers sa pagsakmit ning maong produkto kun masakpan kini nga gibaligya sa merkado.
Gipadayag ni Hartigan-Go nga ang maong produkto sa Health Wealth International Corporation giingong wala na marehistro sa FDA tungod kay na-expire na kini niadto pang tuig 2009.
Gitumbok pa sa FDA nga ang maong produkto dili tinuod nga may “therapeutic claims†batok sa nagkalain-laing sakit apil na ang dengue, cancer, diabetes, leptospirosis, high blood pressure, high blood sugar, high cholesterol, arthritis, rheumatism, gout, rhinitis, impotence, goiter, arterial venous malformation, pre-menstrual tension, menopausal complaints, kanunay nga pag-ihi ug myoma. (BANAT NEWS)