CEBU, Philippines - Naunay ug napigsat ang ulo sa usa ka drayber sa tanker truck human naligiran sa ligid ang iyang ulo samtang nag checkup sa ilawom niini kay naaberya diha sa bukirang bahin sa barangay Cadulawan lungsod sa Minglanilla niadtong Huwebes sa alas 8:20 sa gabii.
Ang drayber nga patay nang nadangat sa tambalanan mao si Allan Nadela,38, taga Sityo Bayong, barangay Inayagan sa siyudad sa Naga kinsa bag-ohay pang naghatud og tubig sa sitio Kamarin sa barangay Veto sa maong lungsod.
Matud ni PO2 Nikki Carlo Plarisan sa Minglanilla Police dihang nahinabi sa Banat News ang truck boy nga si Melquides Ramos mitug-an nga samtang nagdulhog na sila pabalik sa lungsod kalit nga dunay naguba sa ilawom sa tanker.
Tungod niini mihunong si Nadela ug mihigda sa ilawom aron susihon ang guba. Apan kalit nga miabante ang trak ug naligiran sa pangulahiang ligid ang ulo ni Nadela.
Ang trak nalahos usab ngadto sa panimalay sa usa ka Eric Flores kinsa padung untang mokaon sa ilang kusina.
Si Nadela gidali pagdala sa Minglanilla District Hospital apan gideklarar na kini sa mga doktor nga dead on arrival. (Darrel A. Carumba/EIM) (BANAT NEWS)