CEBU, Philippines - Gisulong sa nasuko nga mga vendors sa Tabunok ang mga opisyal karon sa administrasyon kabahin sa resolusyon nga gipalabang sa pagpaguba sa karaang building sa merkado sa Tabunok aron tukoran og bag-ong tulo ka andanang building ug parkingan.
Niadtong Martes sa gabii dunay grupo sa mga vendors nga misulong ngadto sa balay ni Konsehal Danny Caballero ug usa sa maong vendor ang giingong nagwara-wara sa kopya sa resolusyon nga napalabang ni Konsehal Val Ylanan duha ka semana na ang nakalabay.
Ang maong resolusyon nagmando sa city engineering sa pagpaguba sa karaang building sa merkado sa Tabunok aron tukoran og laing tulo ka andanang building sa merkado lakip na ang parkingan.
Apan ang maong pagpaguba matigayon lang kini kung duna nay tukmang pundo alang sa maong proyekto.
Giingong ang mga vendors nasuko kang Caballero, Ylanan, Aldin Diaz ug Bise Mayor Romeo Villarante sa pagtuo nga papahawaon na usab sila ug dili na gyud sila patindahon diha sa merkado sa Tabunok. Matud ni Caballero ug Ylanan nga dunay tawo nga mipakatap og sayop nga impormasyon ngadto sa mga vendors ug wala tarunga sa pagsabot o pagbasa ang resolusyon.
Ang maong mga konsehal miawhag sa publiko nga dili unta motuo dayon sa mga sulsol sa ubang mga tawo ug susihon una kung unsay sakto nga punto. Dugang ni Caballero nga alang sa kaayohan sa Talisaynon ang ilang gilantaw. (BANAT NEWS)