CEBU, Philippines - Nahuman na ang eleksyon ug nadeklarar na ang mga mananaog, apan duna gihapoy mga supporters ang di kadawat sa kapildihan sa ilang pambato sama sa nahitabo sa usa ka supporter ni Tuburan Mayor-elect Aljun Diamante.
Usa ka 48-anyos nga lalaki ang natusak og bala human kini gipusil sa iyang silingan nga kontra partido human sa mainiton nilang panaglalis samtang nag-inom og bino diha sa barangay Monte Alegri sa lungsod sa Tuburan niadtong Domingo sa alas 5:00 sa hapon.
Ang biktima mao si Roel Lawas, molupyo sa maong lugar samtang ang suspek mao ang iyang amigo apan kontra partido sila sa nilabay’ng pinili-ay nga si Ronnie Palaugon, 35.
Matud ni PO1 Joseph Bejer sa Tuburan Police dihang nahinabi sa Banat News ang biktima ug suspek nag-inom niadtong tungora apan nagkainitay ug nagtinubagay tungod sa politika.
Tunga-tunga sa ilang init nga diskusyon nananghid ang biktima kay kini mangihi apan sa pagtalikod niini, gipusil kini sa suspek makadaghang higayon.
Ang biktima nakaangkon og daghang samad pinusilan sa tiyan ug lawas ug patay na pag-abot sa Tuburan District Hospital.
Daling miikyas ang suspek human sa hitabo. Nasayran nga ang biktima supporter sa naparot nga si mayoralty candidate Rose Suezo samtang ang suspek giingong supporter usab ni Diamante. (BANAT NEWS)