CEBU, Philippines - Si Talisay City Vice Mayor-elect Romeo Villarante maoy mi-preside sa gipahigayong regular session sa konseho sa Talisay sa miaging Martes sa buntag.
Kini samtang ang outgoing vice mayor nga si Alan Bucao wala motungha tungod kay nag-special leave.
Wala usab makatunga kagahapon ang president protempore nga si Konsehal Eduardo Gullas III .
Sa naandan kung wala ang presiding officer ang president protempore maoy mo-preside sa sesyon.
Dayon kung wala usab kini, ang majority floor leader maoy mo-preside ug kung wala ang majority floor leader ang sunod niya maoy mag-presiding officer.
Si outgoing councilor Rodi Cabigas kinsa maoy majority floor leader nagkanayon nga siya ug ang assistant majority floor leader nga si konsehal Dennis Basillote adunay gipasar nga mga resolusyon hinungdan nga wala sila mo-preside.
Matud niya nga atol sa ilang caucus gikasabutan nilang i-dispense una ang ilang house rules ug si Villarante ang ilang gipiling mo-preside aron usab kini mabansay-bansay inig-lingkod niini sa pwesto.
Si Villarante sa iyang bahin, nagkanayon nga nakalitan siya dihang gitudlo sa iyang mga kauban nga mo-preside sa sesyon, apan gidawat niya ang maong hagit.
Si Villarante midugang nga ang unang reaksiyon niya mao ang pagbalibad apan tungod kay siya man ang gitudlo sa grupo hinungdang wala na siya makabalibad. (BANAT NEWS)