CEBU, Philippines - Kusganong gipang-himakak ni kanhi Konsehal Jocelyn Pesquera nga may kalabotan siya sa pagkapilde ni Annabelle Rama pagka kongresista sa Cebu City north district sa miaging eleksyon.
Nagduda si Annabelle Rama nga giitsa-pwera siya ni Pesquera kay nasuko kaniya nga nagdala siya’g mga artista dinhi sa Sugbo, apil ni Pops Fernandez nga gika-duet ni Mayor Mike Rama sa “Bakit Ngayon Ka Lang.†Si Pesquera usa sa mga abogado sa United Nationalist Alliance (UNA) nga gisandigan sa Team Rama sa ilang pagpapili sa miaging eleksyon.
Matud ni Pesquera nga wala g’yud siya’y labot kun napilde man si Annabelle Rama kay ang mga watchers sa north district gipasabot og maayo sa ilang gimbuhaton pinaagi ni Atty. Ernesto Rama, ig-agaw ni Annabelle.
Ang talent manager nga ig-agaw sa mayor miingon nga wala ayoha og bantay sa mga watchers nga dili mabinuangan ang iyang botos, apan daghan hinoon ang mikatawa lang sa pamahayag ni Annabelle Rama.
Si Pesquera nagkanayon nga kataw-anan ang giingon ni Annabelle nga nasuko siya, nga nagka-duet si Mayor Rama ug naggunitanay pa’s kamot samtang nanganta. Matud ni Pesquera nga wala siya didto sa maong higayon kay wala gani siya makatambong sa mga show nga gipasiugdahan ni Annabelle, apil kadtong Willie Show atol sa pagsaulog sa iyang birthday ug sa Miting de Avance. (BANAT NEWS)