CEBU, Philippines - Patay ang usa ka polis human gidudahang nakatulog samtang nagmaniho sa iyang sakyanan nga mibangga sa punoan sa kahoy ,dayon natagak sa kimba didto sa barangay Sabang sa lungsod sa Sibonga kagahapon sa alas 4:30 sa kaadlawon.
Ang biktima mao si PO2 Iranie Dela Vega, 35 , minyo ug nagpuyo sa Poblacion, Sibonga apan nadistino sa Traffic Division sa siyudad sa Sugbo.
Si SPO3 Zacarias Cabaluna sa Sibonga Police Station mibutyag sa Banat News nga si PO2 Dela Vega nagmaniho sa iyang sakyanan nga Sportage gikan sa siyudad sa Sugbo ug paingon na untang mopauli.
Apan matud pa nga samtang nagpadagan sa iyang sakyanan sa kurbadahon nga bahin sa maong lugar kalit lang kining midasmag sa punoan sa Indian tree, sa daplin sa karsada ug wala na maka -control dayon miambak sa kimba, nga gibana- banang 7 ngadto sa 10 ka tiil ang giladmon.
Ang kapolisan nga gipangulohan sa ilang hepe nga si C/Insp. Bonifacio Tecson sa Sibonga Police Station maoy nangulo sa pag-respondi ug mao nay miugkat kang PO2 Dela Vega nga didto pa sa sulod sa sakyanan ilawom sa kimba niadtong tungora.
Wala na kini sa panimuot ug dayon gihatud nila sa Carcar City District Hospital apan gideklarar nga Dead on Arrival ( DOA).
Samtang gibutyag ni Joy Tumulak executive officer sa City traffic Operation Management (Citom) nga mga ala 1:00 sa kaadlawon naghatud si PO2 Dela Vega sa iyang asawa sa airport kay molarga sa gawas ug sa pagpauli na unta niini nakasugat sa maong disgrasya.
Matud ni Tumulak nga si Dela Vega sakop sa traffic group dinhi sa dakbayan sa Sugbo. (Darrel A. Carumba/WC) (BANAT NEWS)