CEBU, Philippines - Kapin sa P62 mil cash ang nahanaw human lungkaba ang usa kagasoline station sa barangay Pitogo , lungsod sa Consolacion sa mga alas 3:00 ngadto sa 4:00 sa kaadlawon niadtong Huwebes.
Ang biktima sa pagpanglungkab mao ang Caltex Gas Station nga gipanag-iya nila ni Allan Bergano,45, minyo, taga Singson Village, siyudad sa Mandaue ug Charlito Montenegro, 58, minyo, nga taga barangay Nangka, Consolacion.
Si SPO1 Francisco Perez Jr., sa Consolacion Police Station mibutyag sa Banat News nga ang pump boy nga si Vincent Ian Bregoli, hingkod, maoy nakadiskubri sa maong lungkab dihang abli na ang pultahan sa opisina sa maong gasolinahan sa pagpangabli nila niini sa mga alas 4:00 sa kaadlawon sa maong adlaw.
Sa ilang pagsusi nasuta nila nga nawagtang na ang P62,551 nga halin nianang miaging adlaw ug hangtud nga nanira sila sa pagkagabii.
Nasayran nga bukas ang maong gasolinahan gikan sa alas 4:30 sa kaadlawon hangtud sa alas 10:30 sa gabii.
Way nahimo ang tag-iya gawas sa pagdangop sa buhatan sa kapolisan aron ipa -blotter ang maong hitabo.
Sa pagkakaron padayon pang gipanid-an sa kapolisan sa lungsod ang mga kawatan. (BANAT NEWS)