CEBU, Philippines - Naundang ang lingaw-lingaw sa usa ka pamilya human pusila patay ang usa ka miyembro niini sulod sa ilang panimalay sa Sitio Mananga, barangay Tabunok, dakbayan sa Talisay sa miaging gabii.
Ang biktima giila nga si Alex Alcansado y Taba, 45, lumolupyo sa maong dapit.
Segun sa imbistigasyon sa kapolisan nga gihimo ni SPO1 Mikie Espina, nasuta nga ang biktima kauban ang iyang pamilya nagtapok sulod sa ilang balay ug naglingaw-lingaw dihang kalit nga miabot si Junior Dejamo, 42, taga barangay Campo 2 sa maong dakbayan ug sa wala’y igong hinungdan gipusil patay ang biktima.
Dihang nahagba sa sawog ang biktima tungod sa pagkaigo sa iyang liog, dali kaayong nakadagan pahilayo sa maong lugar ang suspetsado.
Nangayo og tabang sa mga silingan ang pamilya sa biktima ug gihatud dayon kini ngadto sa Talisay District Hospital apan pag-abot niini sa tambalanan gideklarar kining dead on arrival.
Napunitan sa kapolisan sa dapit nga nahitaboan ang basiyo sa bala sa kalibre .45 nga pistola.
Sumala ni Espina may personal nga atraso ang biktima ngadto sa suspetsado segun sa alegasyon sa kapuyo sa biktima
Sa pagkakaron padayon pang gipangita sa mga kapolisan ang suspetsado. (/WC) (BANAT NEWS)