San Pedro Calungsod mainitong gidawat sa mga Ilonggo

CEBU, Philippines - Mainiton ang pagdawat sa taga Molo, Iloilo kang San Pedro Calungsod diin liboan ka mga tawo ang misugat kaniya sa iyang pag-abot sa maong dapit sa pagsugod sa Duaw Nasud niadtong miaging adlaw.

Matud pa ni Fr. Charles Jayme, ang pangulo sa Duaw Nasud team ug ang official custodian sa pilgrim image ni San Pedro Calungsod, kasagaran sa mga nisugat mga kabatan-onan.

Bisan sa pagbunok sa uwan, ang mga youth organizations sa Iloilo mihimo og praise and worship activity alang kang San Pedro Calungsod nga gipangulohan ni Fr. Boy Celis, ang kura paroko sa St. Anne Parish.

“We had a great night, last night, with the praise and worship activity of the youth. Bisan og uwan, full pack gihapon. They really made the youth participate,” matud pa ni Jayme.

Ug kay ting eleksyon, aduna gyuy mga politiko nga misalmot sa maong kalihukan apan nakig-coordinate si Jayme sa mga church officials nga dili tagaan og panahon sa pagsulti sa atubangan sa publiko ang mga kandidato.

“They (politicians) are welcome, but they are not welcome to speak. They were there as believers and as Catholics. We made it a point that even the incumbent, dili sila hatagan og chance makastorya para walay political color,” niya pa.

Giisip sa mga parokyano nga second homecoming na kini ni San Pedro Calungsod sa ilang dapit.

“Sa first, it was a limited time, they requested the image to be back in Molo and sent a request to Palma and he approved it. And while we were here, we will make use of the time to visit the neighboring dioceses,” matud ni Jayme.

Kagahapon, adunay solemn procession sa pilgrim image ug karun ibalhin na kini sa Capiz. Inig Mayo 1-5 adto kini sa Romblon, dayon sa Aklan inig Mayo 7 ug sa Antique. Moabot sila sa Sugbo inig Mayo 10. (Marigold P. Lebumfacil/EIM)

Motor misaliring tungod  sa iro, rider patay

Ni Lesley Caminade-Vestil

Tungod sa iro maayong pagkalambos sa usa ka lalaki nga miresulta sa hinanali niyang kamatayon pasado alas-3 sa miaging hapon diha sa national highway sa barangay Sabang dakbayan sa Danao.

Ang biktima nailhan nga si Abner Fernandez, 21, molupyo sa barangay Sandayong Sur sa maong dakbayan.

Sa imbestigasyon sa kapolisan nasayran nga ang biktima sakay sa iyang motorsiklo niagi sa maong dapit dihang kalit nga milabang ang usa ka iro.

Apan giingong wala na makakontrolar pa ang biktima sa iyang motorsiklo nga maoy na-ingnan nga naligsan ang iro apan natumba ang motorsiklo ug misagirit og 18 ka metros ang motor una pa nalagpot ang biktima.

Giingong ang biktima gikan pa sa barangay Maslog ug patubang unta kini sa barangay Poblacion sa maong dakbayan dihang nahitabo ang aksidente.

Dali unta kining gidala sa Danao City Provincial Hospital apan nakabsan ra usab sa kinabuhi ang biktima pipila ka minutos ang milabay. (BANAT NEWS)