CEBU, Philippines - Gikuwestyon karon sa abogado sa kampo sa gi-ambush nga si Edgar Lim human ang kapolisan misusi sa sakyanang BMW nga walay saksi ug walay pagtugot gikan kanila.
Si Atty. Noel Archival nga abogado ni Lim mibutyag nga nahibulong sila nganong ang sulod sa sakyanan ni Lim gilakip og suhid sa kapolisan kun ang katuyoan lang niini mao ang gawas nga bahin sa sakyanan aron masuta ang gi-agi-an sa bala.
Dugang pa ni Archival nga angayan usab nga susihon sa kapolisan kun kinsa gayud ang nanag-iya sa gituohang shabu nga nakuha sa sakyanan ni Lim ug kun tinuod ba usab kini nga shabu.
Samtang ang hepe sa kapolisan sa dakbayan sa Sugbo, Sr. Supt. Mariano Natuel, mipasabot nga katungod sa kapolisan ang pag-imbistigar sa sakyanan sa biktima ilabi na nga natusak kini sa mga bala aron pagkuha og dugang pang ebidensya nga may labot sa maong krimen.
Samtang ang hepe sa kapolisan sa City Intelligence Branch, Chief Insp. Romeo Santander mipadayag nga usa sa gisubay nilang anggulo karon mao ang kalambigitan ni Lim sa illegal nga sugal human kini giingong gitumbok nga financier sa suertres.
Dugang pa ni Santander nga posibling adunay kontra ang biktima apan base usab sa gibutyag sa pamilya niini, wala kini kontra.
Sa miaging hapon si Lim luwan sa iyang BMW dihang pag-abot niya sa duol sa nasunog nga White Gold sa North Reclamation gipusil siya sa wala hiilhing kriminal ug nasabak ang iyang tiyan ug tuong bahin sa iyang nawong. (/WC) (BANAT NEWS)