CEBU, Philippines - Human sa usa ka adlaw nga pagtago, nadakpan ang giingong nagpusil patay sa iyang bata-bata niadtong Domingo sa buntag diha sulod sa ilang panimalay sa sitio Mangga barangay Tisa dakbayan sa Sugbo kagahapon.
Si Arnel Parba, 27, maoy gitumbok nga responsabli sa pagpusil patay ni John Carlos Bardinas nga iyang gikatahong bata-bata. Matud pa ni SPO3 Rey Cuyos sa Homicide Section nga pinaagi usab sa tabang ni SPO2 Jeoffrey Diola sa City Intelligence Branch (CIB) ilang nasikop ang suspetsado pasado alas -7 sa buntag kagahapon. Dugang pa ni Cuyos nga ang suspetsado mibiya human sa maong panghitabo apan mibalik ra usab kini kagahapon sa kaadlawon ug didto na kini matulog sa panimalay sa iyang inahan duol sa nahitaboan. Nakuha gikan sa suspek ang usa ka kalibre .45 nga adunay unom ka bala. Narekober sab sa kapolisan ang usa ka kabhang sa maong armas.
Matud pa ni Cuyos nga nagduda silang ‘nagtama’ o sabog pa sa gidiling drugas ang suspek dihang ila kining gidakop.
Si Parba dihang gipangutana sa media bahin sa giingong kalambigitan niini sa ilegal drugs ug sa pagpusil patay kang Bardinas nag usab-usab ang tubag niini.
Una iyang gihimakak nga nakaila siya sa biktima ug pagkataud-taod mibutyag kini nga managhigala silang duha.
Gihimakak niya ang report sa kapolisan nga nalambigit siya sa ilegal nga drugas apan wala na motingog pa dihang gipangutana kabahin sa ilegal nga drugas nga nakuha sa iyang balay.
Niadtong Domingo sa buntag, gipusil patay diha sa sulod sa lawak ni Parba si Bardinas, ang duha ra maoy nagkuyog sa maong hitabo sumala pa sa pasiunang imbestigasyon. (BANAT NEWS)