CEBU, Philippines - Gibutyag ni Provincial Board Member Thadeo Ouano nga ang mga nasinati nga baha sa kalungsoran ug mga dakbayan sa Sugbo gihimoan na og lakang sa iyang buhatan pinaagi sa ordinansa sa hunta probinsiyal.
Gipadayag kini niya isip reaksiyon sa mga pamahayag ni Assistant Secretary Elisa Gosun sa iyang pagduaw dinhi sa Sugbo dili pa dugay.
Matud pa ni Ouano nga isip chairman sa committee on environment sa hunta probinsiyal sa lalawigan sa Sugbo iyang nakita ang panginahanglan nga angay himoon aron kalikayan ang mga pagbaha sama sa nasinatian sa uban nga mga dapit dinhi sa nasud.
Si Ouano miingon nga sa iyang gipangamahanan nga resolusyon iyang gilakip ang pag-umol og Septage Management Program nga moaghat sa mga hingtungdan sa makanunayon nga pagpanglimpiyo sa mga septic tank ug lakip na usab sa pagbutang og Sewage Treatment Facilities niini.
Dugang pa ni Ouano nga ipaumol usab niya ang Povincial Water and Sanitation Authority sa lalawigan sa Sugbo nga maoy mohan-ay sa mga lagda nga subayon alang sa pagpanalipod ug pagpreserbar sa mga tinubdan sa tubig dinhi sa lalawigan.
Umolon usab pinaagi sa iyang ordinansa ang Water Resources Management nga ipahaum sa Environment Code aron maatiman ang maayong pagdumala sa tubig, pagsanta sa water pollution, stormwater ug drainage management, septage, watershed, and river basin management, flood prevention and management program sa kagamhanan sa lalawigan. (BANAT NEWS)