CEBU, Philippines - Nahibalik na sa ilang tagsa-tagsa ka puwesto ang upat ka mga intelligence officer human kini ipaubos sa lima ka adlaw nga refresher course bahin sa estriktong pagpatuman sa illegal gambling sa ilang area of responsibility.
Matud pa sa hepe sa kapolisan sa Police Regional Officer (PRO-7) nga si Chief Supt. Marcelo Garbo nga kun n girilibohan man sila sa ilang katungdanan, mahimong makabalik pa sila.
Dugang pa ni Garbo nga sa ilang gihimong imbestigasyon nasuta nga aduna lay gamay’ng kakulangan sa ilang pagpahunong sa illegal nga sugal.
Ang nahibalik sa ilang pwesto kansang ngalan wala lang ibutyag mao ang intelligence officer sa Cebu Provincial Police Office, Cebu City Police Office, Mandaue City Police Office ug Negros Oriental Police.
Matud pa ni Garbo nga ilang gihatagan og ikaduhang higayon ang mga nahisgutang intelligence officer apan mibahad siya nga dili siya magduha-duha sa pagrelibo kanila kun ugaling dili gihapon kini makatuman sa mando.
Matud pa ni Garbo nga mahimo kining usa ka leksyon ngadto sa ubang kapolisan nga relax kaayo sa ilang katungdanan.
Kahinumdoman nga sa milabay’ng semana gimando ni Garbo ang pagparelibo sa unom ka intelligence officer human niya masayri pinaagi sa ilang gihimo nga imbestigasyon nga ang maong mga opisyal wala motuman sa ilang katungdanan sa pagsumpo sa illegal nga sugal sa tagsa-tagsa ka hurisdiksyon.
Gipadayag usab ni Garbo nga susama sa unom ka intelligence officer mopaubos usab sa refresher course ang ubang polis nga narelibohan gumikan sa susamang salaod. (BANAT NEWS)