CEBU, Philippines - Nakakita og igong basehan ang Provincial Investigation and Detection Management Branch (PIDMB) aron pasakaan og kasong administratiba ang duha ka mga polis sa San Remigio tungod sa pag-eskapo sa usa ka suspek sa pagpanulis ug pagpatay niadtong Oktubre 2.
Ang PIDMB mirekomendar nga pakasohan sila si SPO1 Nicolas Navales ug PO1 Herman Bulawit tungod sa maong hitabo, samtang ang ilang hepe nga si Insp. Aniceto Manloloyo aduna pay lawom nga imbestigasyon batok kaniya.
Matud pa wala dayon motug-an si Manloloyo sa nahitabo sa ilang binilanggo nga nakaeskapo.
Ang maong bilanggong nakaeskapo mao si Nonilon Lequigan Magallanes, kinsa miguba sa kisame pinaagi sa paggabas ug pagbawog sa kabilya sa ibabaw niini ug nakalusot gikan sa gabok nga plywood nga maoy kisame sa maong karsel.
Nadiskubrehan lang kini niana nang pagkabuntag. Si Magallanes nadakpan sa San Remigio police niadtong Nobiyembre 30 sa Sitio Patag, Barangay Argawanon, pinasikad sa arrest warrant sa kasong robbery with homicide nga pinirmahan ni Judge Henry Basilia sa RTC Branch 49, Cataingan, Masbate. (BANAT NEWS)